شوية حُبّ..

طبعاً وصلني واجبين من فترة عن (10 حالات حب) بس وقتها ما كنت متفرغة بذمة عشانه، وكنت محتاجة شوية وقت وتفكير أنا أحب أيش بالضبط. عموماً التمريرات وصلوني من عالم أسماء و محمد ملياني ..

والواجب.. أهوه:

1- خطّي P: أقصد التخطيط. أختي (خطاطّة) كانت -ومازالت- تقول أنّي مشروع خطاط وفشل لسبب ما. والحمدلله بالنسبة لي.. خطي الآن أعتبره في نص الطريق لأن يكون جميل جداً.. مع أنه مع عدم التدريب أو الكتابة بشكل مستمر صار شنيع ومو عاجبني مع أنه حلو ج داً وواضح (عاد فسروها أنتوا) .. أوقات في العمل أكون مضطرة أكتب بسرعة فـ يصير خرابيش دجاج .. لكن مفهوم للقارئ.
أحاول أرجع أكتب بخط جميل ومستقيم حالياً.. أصلي قرفت (رئيستي في العمل) من كثر ما أقول لها: (أرحميني، خطك بالمرة شنيع!) .. ترى لو ما لقيتوا لي تدوينة بعد رمضان اعرفوا انها قرأت الموضوع ده . D:

2- أوراقي. طبعاً بحكم أني كاتبة (أو أديبة زي ما بيقولوا) فـ عندي مسودّات لنصوص كثيرة وعبارات أكثر.. وأشياء مالها داعي على قول اللي حولي. مثلاً.. لو فتحت أي كتاب من كتبي الدراسية ممكن ألقى أي شيء متصل فيها.. ورقة اختبار لمادة غزو فكري، أو حديث، أو عقيدة.. الخ. ولما أتخلص من ورقة.. أكون متأكدة أن المعلومات أو اللي مكتوب فيها عندي نسخة ثانية منه عالكمبيوتر أو.. في دفتر .

3-الكتب. ما أحب (أي كتاب حتى لو ما كان لي) يصير عليهم شي لو هه تتطعوج وتتكرمش ورقة من أوراقه أجيب المكوة وأكويها. أعتبرهم أغلى من أي 1000000 ريال ممكن تكون عندي.. ولو صار عندي هالمبلغ فـ أول شي بسويه أعمل لي مكتبة من السقف للأرض في قاااااعة كبيييييييرة في بيتي بمشيئة الله ! .. (حلمي الأزلي)

4- أحب أصدقائي بدرجة مجنونة جداً. عيّوشة وفتو ولولا (هذولي ناسّ لازموني ولازمتهم لحد الآن فوق 12 سنة.. يعني مو بس عيش وملح.. إلاّ عشرة عمر) .. أحبّ موها (مع أننا قطعنا علاقتنا ببعض لسبب ما).. أحبّ فوفة كتييييير (وهيّ روحي)، .. وHeavon (أسمك ع جوالي كده) ما أقدر أوفيها حقها بالمرّة.. لكن (ح نكبر مع بعض إلى أن يشاء الله ونتوكل لا سمح الله).. وأحب الواد سوسة (لأنه صديق بكل معنى كلمة صديييق).. و زهرة (لأننا فاهمين بعض “أتمنى”).

5- أحب قول الرسول اللهم صلّي وسلّم عليه: (فـ ليتقنه) عن العمل. هذا يعني أنّي لو عملت أي حاجة أحاول قد ما أقدر أطلّعها متقنة.. الكلام ده ينطبق على حياتي كلها ومش مقصورة على أدائي في العمل وبس.. وأطبق وصية الرسول صلى الله عليه وسلم.. عليها.

6- أحب طريقة تفكير محمد العوضي ومنطقيته. هالبني آدم عندي مختلف عن كثييير جداً.. وأفضله على كثييييييير في مجاله وعلى كثيييييير من مشيختنا. أكره شي عندي أنو برنامجه في رمضان (السنة اللي فاتت ما كان له برنامج وما أعرف لو هالسنة كمان) بياخذ بس 2/1 ساعة. حقيقي كلامه مش ممل.. ربطه للأحداث.. تعليقاته.. يخليك تحس أنّ هالوقت القليل أقل مما يجب أنو ينعرض للقيمة الفكرية في كلامه.
أشجع الكل لو جاء رمضان.. وكان له برنامج ع قناة الكويت الفضائية.. اتفرجوا عليه.. بالعادة هو قبل أذان المغرب (ع توقيت مكة) بساعة تقريباً .

7- كل شيء يتعلق بالتقنية والأجهزة. أنا مهووووسة باعتدال بهذي الأشياء لكن لما نوصل عند الكاميرات وأنواعها.. خاصة الكانون ولا النيكون.. قلبي ينوجع (مانعة حالي أشتري أي كام حالياً بقوة) بكل معنى كلمة وجع !
طبعاً حيفهموني هنا الناس اللي تحب التصوير.. كانوا أهلي يكرهوا يسيبوا أي كاميرا في أيدي.. لأني كل شوي أصورهم بسبب وبدون.. وفي أشكال غريبة وعجيبة .. وعلى غفلة (كثروا منها على غفلة هذي) ويحقدوا علي… وبالنهاية بعد تحميض الأفلام أنضرب !!! ( مع أن الصور العفوية لهم عادة تكون أحلى من اللي يسنتروا فيها ويشخصوا بحركات ما أدري أيش تطلع ) .

8- أحب أفلام الكرتون، وما زلت أتفرج مع اولادي عليها. أحبّ باقزبني (باقزي زي ما أحب اناديه) بجنوووووون، كمان كان فيه فلم كرتون قدييييييم (قبل الدشّات والفضائيات ما تكون موجودة) عرضته القناة الأولى شي بتاع 15 حلقة تقريباً وبعدين وقفته على طول (الأحداث لاحقاً تصير love story على ما أظن) فقطعوا عرضه واستبدلوه بشيء ثاني.. (لما أفتكر الاسم راح أحطه لكم هنا).. حبّيت كمان دايسكي أو دوق فليد في غرندايزر.. لأني في الأصل مهووووسة جداً بتطبيق العدل (كلام مجعلص) عاللي حولي.. مع أني أوقات كثيرة شريرة ومفترية.

9- أحب المقالب. ما حقدت على شيء في حياتي قد ما حقدت ع تخرجي من الجامعة.. فيييييين أعمل مقالب.. كنت أحب أعملها في أمن الجامعة (المضروبات على عينهم) من الافتراء اللي كانوا بيعملوه في البنات .. D: .. بعدين كانت حلوة المقالب في ناس ما تعرفهم.
أنا كنت أشتري طراطيع الثوم (الصغيرونة اللي ما تحتاج لولاعة) بكميات كبيرة وأستمتع برميها في أي ممر حيوي في الجامعة .. في عز زحمة البنات (أرميها قبل بفترة) .. وأشوف الرايحة والجاية وهم يتناقزوا من المفاجأة. طبعاً.. لحد ما اتخرجت ما عرفوا ايش الحكاية ولا حتى مين اللي بيعمل كده !
حالياً.. مقالبي أعملها في أولادي … D:

10- أحب غرفة نومي في بيتنا اللي في baker koy. (لازم تعرفوا فين؟) لأني كنت انام فعلاً وأنا أتأمل السماء.. النجوم.. وياسلام لما يكون القمر بدر !! .. أحلى من كده مافي.. كنت أطلع وقتها على البلكونة.. وآخذ لي بطانية صغيرونة وأقعد هناك.. كوب شوكولا ساخنة وأتفرج عالبحر والليل !! (وحشني السفر على فكرة)

طبعا.. الأشياء اللي أحبها أكثر من كده لكن هذولي.. الأبرز وبغض النظر عن ترتيبها … ده اللي طلع في بالي وأنا أفكر وأكتب الرد .

أمرر التاغ ؟

لا، ما أظن. الناس اللي أعرفها ما تحب التمريرات.. ولأني أحترمهم جداً إضافة إلى أني ما أعرف المدونين اللي يحبوا مثل هالتمريرات.. فـ ما راح أمرر لأحد.

أخيراً.. إللي بعدو ما شعبن فاليوم 18 وباقي أيام على آخر الشهر (ونقول لكم.. رمضان كريم من الآن) .. حاولوا تشعبنوا وانبسطوا ..
(لا أحد يجي ويقول لي بدعة، أنا غير مسؤولة عن الاشياء اللي بتحصل في هذي الشعبنة بحكم كونها من طرق الصوفية زمااااااااااااااان “زمان يعني قبل 200 سنة”) …

تحياتي،،،